De Statuten

(1) De Stiften driggt den Naam „Plattdüütsch-Stiftung Neddersassen“.

(2) De Stiften sitt in Stood.

(3) De Stiften is en rechtsfähige Stiften van dat börgerliche Recht.

(4) De Stiften worrt van den Ministerpräsidenten van Neddersassen de jüst in dat Amt is, as Schirmherr ünner sien Flögels nahmen.

(5) De Spoorkassendirektor a.D. Hans-Peter Fitschen ut Stood hett de Stiften grünnt.

(1) De Stiften schall Heimatpleeg un Heimatkunn wieterdrägen. Dorto schall se de Regionalspraak Nedderdüütsch ünnersöken, wieterdrägen un allens doon, dat de Spraak ok wieterhen snackt un verstahn worrt.

(2) De Stiften warkt in ganz Neddersassen.

(3) Dat wat de Stiften utmaken deit, is

a) dat se gode Projekten un Veranstaltens op un för Plattdüütsch in Neddersassen un sien Kuntreien stütten deit.
b) dat se Wetenschapp un Lehr in un över de Regionalspraak Plattdüütsch stütten deit.
c) dat se lanneswiet wichtige Veranstaltens, Fortbillens, Beleevnisse för Plattdüütsch op’n Weg bringen un disse stütten un ümsetten deit.
d) dat se Kurse, Projekte un Programme op’n Weg bringen, stütten un ümsetten deit, woans Kinner un junge Lüüd op Duer de Regionalspraak in jüm ehr Ohren un op de Tung kriegen doot.

(4) Andrääg op Help un Stütt dör de Stiften köönt ok över de Landschap / den Landschapsverband stellt warrn, wo de tohuus is, de den Andrag stellt.

(5) De Stiften arbeid sülvstlos un blots för den Vördeel van de Allmeen, dat meent för all de Lüüd na den Afsnitt „stüerbegünstigte Zwecke“ van de Afgavenörden.

(6) De Middels van de Stiften drööft blots för dat bruukt weern, wat in de Statuten binnensteiht. De Stifters un Tostifters un jüm ehr Arven kriegt nix ut de Middels van de Stiften rut.

(7) Keeneen Person dröfft dör Utgaven, de nich mit den Zweck van de Stiften doon hett oder dör unbannig hoge Utgaven begünstigt warrn.

(1) Dat Vermögen van de Stiften besteiht to den Tietpunkt, as de Stiften ehr Warken opnahmen hett, ut 100000,00 € bor Geld (in Wöör: eenhunnertdusend Euros). Dat hett de Stifter de Stiften na de Stiftungsurkunn so todeelt.

(2) Dat Vermögen van de Stiften mütt so bestahn blieven. De Stiftungsvörstand leggt de Summ so an, dat dor mehr ut worrt. Dat Vermögen van de Stiften kann dör Tostiften van anner Lüüd wieter stiegen.

(3) De Vermögen van de Stiften un de Tostiftungen van anner Lüüd, de nich dat Vermögen van de Stiften grötter maken doot, dröfft na § 2 bruukt warrn un för Verwaltungskösten insett warrn.

(1) To den Vörstand höört fief Lüüd to. Die Maten van den Vörstand sünd

a) de Stifter, de de Stiften grünnt he oder sien Nafolger.
b) een Vertreter van den Landschapsverband van de ehemaligen Hertogtümer Bremen un Veern op de ehren Vörslag.
c) twee Vertreters van Landschapen oder Landschapsverbännen op Vörslag van de Arbeetsgemeenschap van de Landschapen un Landschapsverbännen in Neddersassen – ALLViN._
d) en Vertreter van de Kreisspoorkass Stood op de ehren Vörslag. De Amtsperiode van de Maten in’n Vörslag wohrt veer Johr. Se blievt so lang in jüm ehr Amt, bet en Nafolger wählt is. De Maten in den Vörstand schullen möglichst ok Plattdüütsch snacken könen.

(2) De Vörstand wählt den Vörsitter / de Vörsittersche van den Vörstand un sienen Stellvertreter ut den Kreis van Lüüd na § 4 Abs. 1 för veer Johr.

(3) De Vörsitter / de Vörsittersche laad to de Sitten van den Vörstand in, wenn dat ansteiht. He stüer dorto ok en Dagsörden mit to. De Inladen geiht twee Weken vörher an de Maten van den Vörstand. Wenn dat Noot deit, kann de Inladen ok kortfristiger tostellt warrn. Jedeen Johr mütt den Vörstand tominnst en Sitten afholen.

(4) De Vörstand kann besluten, wenn tominnst dree Maten bi de Sitten dorbi sünd. De Vörstand beslutt, wenn de Statuten nix anners vörgeevt, mit eenfache Mehrheit van de op Ja oder Nee afgeven Stimmen. Wenn de Stimmentahl overeen is, gifft de Stimm van den Vörsitter den Utslag. Över dat, wat de Vörstand beslaten hett, worrt en Protokoll opsett, wat de Vörsitter/ de Vörsittersche ünnerschrieven mütt.

(1) De Vörstand steiht vör Gericht un buten dat Gericht för de Stiften dor. Dorbi vertreed de Vörsitter/ de Vörsittersche un/oder de Stellvertreter/ de Stellvertretersche mit en anner Maat van den Vörstand de Stiften tohoop.

(2) De Vörstand kümmert sik dorüm, dat de Stiften so warken deit, as dat in de Statuten vörsehn is. He is tostännig för

a) allens dat to besluten, dat de Stiften na de Statuten op Duer goot warken deit.
b) dat de Middels van de Stiften vergeven worrt.
c) de Johrsreken mit en Översicht över dat Vermögen van de Stiften un en Bericht mit Johrsafsluss över dat wat de Stiften maakt hett, opstellt worrt.
d) allens wat grundsätzliche Bedüden för de Stiften hett.
e) allens dat, wat in de Statuten (vgl. §6, § 8) vörsehn is.

(1) De Vörstand kann för de lopen Geschäften van de Stiften enen Geschäftsföhrer / en Geschäftsföhrersche beropen. De bearbeidt de Opgaven so as dat in § 3 un § 5 vörsehn is.

(2) De genauen Opgaven un Rechte van den Geschäftsföhrer worrt in en Verdrag regelt, de dorto opsett worrt.

(1) De Stiftung steiht ünner de Opsicht van den Staat na de Vörgaven, de in de neddersassische Stiftunsgesett regelt sünd.

(1) Dat Ännern van Statuten, de nix mit de Statuten van de Stiften to kriegen hebbt, sünd möglich, wenn se op Duer de Opgaven na den Willen van den, de de Stiften grünnt hett, wieter drägen doot. Dorför mööt alle Maten van den Vörstand tostimmen un dat mit een Stimm besluten.

(2) Dat Ännern van Statuten, dat Oplösen van de Stiften un dat Tohoopleggen mit anner Stiften oder dat Opdelen in anner Stiften ist blots möglich, wenn de Opgaven van de Stiften na de Statuten nich mehr ümtosetten sünd. Dat gellt ok, wenn de Ümstännen so sünd, wat dat Ümsetten van de Statuten van de Stiften kenen Sinn mehr maken deit. Wenn dat ween schull, mööt de Middels van de Stiften insett warrn, dat se vör allen de düütsche Spraak in Europa wieterdrägen un vele Lüüd dor wat van hebben doot.

(3) Allens wat ünner § 8 Abs. 2 beslaten worrt, mütt mit een Stimm van den Vörstand faat warrn. Wenn nich all de Maten to een Versammeln tohoopkaamt, ok wenn to rechten Tiet inlaad worrn is, reckt bi en nächste Sitten, een Stimm van all de Maten van den Vörstand, de dor sünd. .

(1) Wenn de Stiften ophaven oder oplööst warrn schull oder wenn dat wegfallt, wat de Stiften stüerbegünstigt maken deit, fallt dat Vermögen van de Stiften an de Spoorkassenstiften in Hannober. Se mütt dat Vermögen ganz un gor för all de Lüüd un de Allmeen na §§ 2 un 8 na disse Statuten insetten.

Stood, den 01.06.2017

gez. Hans-Peter Fitschen
gez. Hans-Hinrich Kahrs
gez. Josef Grave
gez. Anne Denecke
gez. Petra Völckers-von Bremen