De Films schullen nich länger as 5 Minuten ween un wat mit Plattdüütsch un de Gegend rund üm to Huus to kriegen hebben. Bi de korte Geschicht in den Film schull een sehn, dat de Filmmakers ok dat insetten deen, wat de Film mööglich maakt. De Filmmakers schullen dormit inverstahn ween, dat ok anner Lüüd den Film to sehn kriegen kunnen un dat „Platt cool is“.
In dree Öllersgruppen sünd Priese utlöövt worrn: Grundscholen, 5.-8.Klass un Klass 9 – 13. 3000 € sünd as Priesgeld utlöövt worrn. In’n September 2017 güng dat los un an den 30. April 2018 schullen al de Bridrääg inschickt ween.
Mehr as 7500 Knickbläder sünd an Scholen, Studienseminare, Landschaften, Landschaftsverbännen, Medienzentren, Lehrerfortbillens ünner de Lüüd brocht worrn.
24 Bidrääg sünd bet Ende April ingahn, to Hauptsaak weren dat Scholen, wenige AGs un Verene.
Bi de Jurysitten an den 22. Mai 2018 hebbt de Juroren Dr. Reinhard Goltz (Vörstandsvörsitter vun dat INS Bremen), Heiko Block (Geschäftsföhrer vun de Radio Bremen Media GmbH) un Hans-Hinrich Kahrs (Lannsschoolbehöörd) jeden enkelten Film ankeken dörsnackt, wat goot weer un wat nich so goot.
Dorna sünd de Priese verdeelt worrn: In de Grupp 1 hett de AG vun de Grundschool Moorriem / Elsfleth wunnen un 400 € kregen. De Klass 3a vun de Grundschool Stakenweg in Ollenborg is an Nummer twee kamen un hett 200€ kregen. De Klass 4c vun de Grundschool Rosche un de Platt-AG vun de Heideschool Schwanwedel hebbt 150 € as Drüdde kregen.
In de Grupp 2 is de Klass 7 vun de KGS Tarms Eerste worrn un hett 400 € kregen, vör de Klassen 6c un 6e vun de KGS Tarms mit 200 €. Bi de Groten hebbt teihn Gruppen mitmaakt. Wunnen un 400 € kregen hett de BBS Willshusen, Klass B7L2, vör de Plattklapp, de Kooperation vun dat Förderzentrum un dat Gymnasium Ganderkesee (200 €) un de BBS Willshusen, BVJ 5/7, B7 21 (150€).
All de annern Gruppen hebbt 50 € to’n Mootmaken kregen.
Dat Priesutdelen weer an den 8. Juni 2018 in Stood. Dor sünd ok de Filme wiest worrn. De schullen bi Youtube to sehn ween un op de Siet vun de Plattdüütsch-Stiftung daallaad warrn.
